1 ліпеня 2024 года адбылося ўрачыстае адкрыццё навучальнага класа філіяла кафедры "Прамысловая электроніка" ГДТУ імя П.В. Сухога на базе ТАА «МІРТЭК-Інжынірынг» – рэзідэнта Свабоднай эканамічнай зоны «Гомель-Ратон».

Прадпрыемства «МІРТЭК-Інжынірынг» з'яўляецца буйным вытворцам сучасных прыбораў уліку электраэнергіі, цепла-, вода- і газазабеспячэння, а таксама спецыялізаванага праграмнага забеспячэння.

Ва ўрачыстым адкрыцці філіяла кафедры "Прамысловая электроніка" прынялі ўдзел прадстаўнікі нашага ўніверсітэта, прадпрыемствы, а таксама прадстаўнікі Гомельскага гарадскога выканаўчага камітэта. Ад універсітэта ў мерапрыемстве прынялі ўдзел рэктар А.У. Пуцята, дэкан факультэта аўтаматызаваных і інфармацыйных сістэм І.І. Сутарма, загадчык кафедры «Прамысловая электроніка» Ю.В. Крышнёў. Прадпрыемства «МІРТЭК-Інжынірынг» прадстаўлялі генеральны дырэктар П.А. Вярхоў, галоўны інжынер М.В. Лакіза, галоўны канструктар, кіраўнік філіяла кафедры С.І. Зайцаў, намеснік генеральнага дырэктара па знешнеэканамічнай дзейнасці, збыце і маркетынгу А.А. Аруцюнян.

Новая навучальная аўдыторыя плошчай каля 100 м2 укамплектавана сучаснымі сілавымі і інфармацыйнымі камунікацыямі, якія ўключаюць 15 ПЭВМ са спецыялізаваным праграмным забеспячэннем: Компас 3D і SolidWorks – для стварэння і рэдагавання 3D-мадэляў; Altium Designer – комплексная сістэма аўтаматызаванага праектавання (САПР) радыёэлектронных сродкаў; Keil uVision5 – адладчык-эмулятар для распрацоўкі і тэсціравання праграмнага забеспячэння мікракантролераў; COM Port Toolkit – праграма для аналізу абмену данымі паміж мэтавай прыладай і ПЭВМ. 

Пасля ўрачыстага адкрыцця прайшлі першыя заняткі для студэнтаў 1-га курса кафедры "Прамысловая электроніка" ў рамках летняй азнаямленчай практыкі. 1 ліпеня заняткі былі праведзены для студэнтаў спецыяльнасці "Электронныя сістэмы і тэхналогіі", а 2 ліпеня – для студэнтаў спецыяльнасці "Сістэмы кіравання інфармацыяй". Акрамя пазнавальных заняткаў, для навучэнцаў былі праведзены экскурсіі па вытворчых лініях прадпрыемства і прадэманстраваны ўсе этапы стварэння электронных прылад: праектаванне і распрацоўка схем з выкарыстаннем спецыялізаванага праграмнага забеспячэння; выраб друкаваных плат; аўтаматызаваны мантаж радыёкампанентаў, дакладнае запайванне SMD-кампанентаў; тэсціраванне, кантроль якасці гатовай прадукцыі. Экскурсаводам выступіў інжынер-электронік прадпрыемства Я.Ю. Елісееў. 

Варта адзначыць, што адкрыццё новай аўдыторыі з'яўляецца ўжо не першым крокам у сферы супрацоўніцтва і рэалізацыі канцэпцыі практыка-арыентаванай вышэйшай адукацыі паміж кафедрай "Прамысловая электроніка" і прадпрыемствам. У 2020 годзе на базе кафедры была адкрыта спецыялізаваная лабараторыя метралогіі і спецыяльных вымярэнняў у прамысловай электроніцы. Штогод студэнты 3 і 4 курсаў кафедры праходзяць канструктарскую і пераддыпломныя практыкі на базе прадпрыемства. Прадстаўнікі прадпрыемства ў 2024 годзе актыўна прымаюць удзел у мерапрыемствах кафедры: удзел у рабоце ў дзяржаўнай экзаменацыйнай камісіі, а таксама ў арганізацыі і правядзенні Міжнароднага адкрытага конкурсу стартап-праектаў "ERA Startup". 

Матэрыял падрыхтавалі аспірант кафедры ПЭ А.Я. Запольскі, заг. кафеды ПЭ Ю.В. Крышнёў

Фотаматэрыялы: прэс-цэнтр СЭЗ “Гомель-Ратон”, прэс-служба ТАА “МІРТЭК-Інжынірынг”, Ю.В. Крышнёў, А.Я. Запольскі